Piary Aaqa S.A.WW K Chalny Ke Halat
Hazrat Hassan bin Ali r.a sy riwayat hy k main ny apni khala Hind Bin Abi hala sy Aap S.A.WW ke raftar k bary mein maloom keya tou ounhon ny kaha k Aap S.A.WW aagy ko jhuk kar chala karty thy, matanat or waqar k sath qadam outhaty thy, chalnyein taiz raftar thy, Aap jab chalty tou aisa maloom hota k jaisy kisi ounchaai sy outar rahy hon, jab Aap S.A.WW kisi ke taraf matwajoo hoty tou pouri tawajoo farmaty, Raasta chalty hoay Aap S.A.WW ke nazar zameen ke taraf jhuki hoe hoti.
Aap S.A.WW ke nigah aasman sy ziada zameen ke taraf rehti.
Aap S.A.WW aksar ghosha e chashm sy daikha krty thy, chalty waqt sahaba ko aagy rakhty or khud peechy chalty, raasty mein jis sy mulaqaat farmaty salam krny mein pehal krty.
Piary Aaqa S.A.WW Ke Raftar Sy Mutaliq Chand Rawayaat
*Hazrat Abu Huraira r.a sy marvi hy k main ny Aap S.A.WW ziada taiz raftar kisi ko nai daikha goya k zameen Aap S.A.WW k leay lipat’ti thee jab hum log Aap S.A.WW k sath chalty tou thak jaty jab kr Aap S.A.WW ke raftar maamooli hoti.
*Ibn e Qaim likhty hein k Aap S.A.WW “HOONAN”
chalty thy.
(Raftar e Hoonan k yeh maani hein k sakoon o waqaar k saath bila takabur k or bila kandha hilaye chalty aisy jaisy bulandi sy nashaibi zameen ke janib)
* Hazrat Jabir r.a sy riwayat hy k Aap S.A.WW apny ashab k peechy chalty thy or kamzor logon ko aagy rakhty thy.
Chalny Phirny K Chand Masnoon Aadaab
1* chalty hoay billa zaroorat idhar oudhar na daikhna
2* Bohat taiz na chalna.
Hadees e mubarika hy k Aap S.A.WW ny farmaya k,
“Bohat taiz chalna momin ka waqar khota hy”
3* Zameen par akar kar na chalna
4* Piary Aaqa S.A.WW chalty hoay tehband zara smait kr chalty thy.
5* Raasty mein pari hoe takleef deh cheezon ko hatana sunnat hy.
6* Itminan or waqar k sath chalna.
7* Takabur sy paoun patakh kar na chalna.
8* Allah ka zikr krty hoay chalna k jin jin maqaamat par Allah ka zikar keya jaye ga wo sub qayamat k din zikr karny waly ke shahadat dain gy or maghfirat talab krain gy k wo bahisht mein dakhil ho.
9* Raston mein chalty hoay batein na krna k aksar raasty shaitan ke kameen gah hoty hein.
10* Chalty hoay aajizi or inkisaari rakhna apni ouqaat ko yaad rakhty hoay k hamari ibtida aik gandy qatry sy hoe.
Msg 2
11* Chalty hoay jouty pehan kar chalna.
12* Aik tarf ho kar chalna
13* Raasty mein khary hoay logon k darmiyan sy na guzrain.
14* Mard raasty mein khari do aourton k darmiyan sy na guzrain.
15* Chalty hoay nigah neechi rakhna
16* Asa hath mein rakh kar chalna sunnat hy.
Ounchaai Charhny Or Utarny K Aadaab
Ounchaai charty waqt Allah o Akbar kehna or outarty hoay Subhan Allah kehna chahiye.
yeh dono intehaai mukhatasir kalmy hein jo hum kaheein bhe outarty or charty hoay aasani sy keh sakty hein.
Khaw do seerhiyan charni hon, swari par charny ka mukhtasir lamha ho ya outarny ka ya paharon par charny outarny ka lamba doraniya ho in sub k doran yeh kalmaat parhny ka intehaai mukhtasir or aasan aamal kr sakty hein.
Aik hadees e mubarika marvi hy k hum safar k doran kisi buland jagah par chary tou Allah o Akbar kehty thy or jab outarty thy tou Subhan Allah kehty thy.
Hadees e mubarika hy k Aap S.A.WW ny ounchi aawaz mein parhna pasand nai farmaya.
Allah o akbar or Subhan Allah ke fazeelat k bary mein hy k yeh zaban par bohat aasan hein magar qayamat k din tarazoo mein bohat wazni hon gy.
EXERCISE QUESTIONS
MCQ’S
1. Paharon par charhty hoay parhna chahiye…
a. Masha Allah
b. Subhan Allah
c. Allah o Akbar
2. Piary Aaqa S.A.WW kis raftar sy chalty….
a. Honan raftart sy
b. Aahista raftar sy
c. Taiz raftar sy
3. Chalty hoay Aap S.A.WW ke nigah hoti
a. asman par
b. zameen par
c. logon par
4. Chalty hoay kin logon ko aagy rakhna chahiye…
a. kamzor
b. bachon
c. bourhon
5. Hath mein rakh kar chalna sunnat hy
a. as’sa
b. tehband ka paloo
c. qameez ka daman
Fill in the Blanks /5
1. Aap S.A.WW chalty tou aisa maloom hota _____ sy outar rahy hon.
2. Zameen par ______ sy nai chalna chahiye.
3. Chalty hoay apni _______ ko yaad rakhna chahiye k hamari ibtada _____ sy hoe.
4. Raasty _____ ke kameen gah hoty hein.
5. ______ sy paoun patkh kar nai chalna chahiye.
True / False /5
1. Aap S.A.WW taiz raftar nai thy.
2. Taiz chalna momin k waqar mein izafa karta hy.
3. Raasty ke takleef deh cheezon ko hatana sunnat hy.
4. Ounchai par charhty or outarty hoay dua buland awaz sy nai parhni chahiye.
5. Chalty haoy Aap sahaba k aagy chalty.
Short Answer Questions /15
1. *Honan* raftar sy keya murad hy?
2. Jin raaston par zikar Allah keya geya ho wo qiyamat k din kis baat ke gwahi dain gy?
3. Ounchaai sy charny or outarny ke dua kia hy?
4. Piary Aaqa S.A.WW ka chalny ka andaz e mubarik apny lafzon mein biyan krain.
5. Allah o Akbar or Subhan Allah ke fazeelat biyan krain.
ANSWER SHEET
MCQ’s
1. (c)
2. (a)
3. (b)
4. (a)
5. (a)
Fill in the Blanks
1. ounchai
2. akar
3. ouqaat / gandy qatry
4. shaitaan
5. takabur
True/False
1. ✖
2. ✖
3. ✔
4. ✔
5. ✖
Short Answer Questions
1. *Honan* raftar sy murad waqar or sakoon sy bina takabur bila kandha hilaye aisy chalna jaisy bulandi sy nashaibi zameen ke taraf chalna.
2. wo zikar karny waly ke shahadat daun gy ous ke maghfirat talab krain gy or aisy log jannat mein dakhil hon gy.
3. Ounchaai par charhty hoay Allah o Akbar or outarty hoay Subhan Allah kehna chahiye.
4. Aap S.A.WW taiz raftar thy, jhuk kar waqar or mtanat sy qadam outhaty, chalty hoay aisy maloom hota jaisy bulandi sy outar rahy hon. Aap ke nigah ziada tar zameen par rehti.
5. Allah o akbar or Subhan Allah parhny mein bohat aasan magar qiyamat k din tarazoo mein bohat wazni hon gy.