EHSAN KARNA
Bazurgaan e deen k nazdeek ehsan ka darja adal sy barh kar hy.
Adal yeh hy k kisi ko itna daina jitna oun ka haq hy or itna laina jitna ous ka apna haq hy.
or ehsan yeh hy k jitna ous ka haq hy ous sy ziada dy or jitna ous ka haq hy ous sy kam ly.
Adal yeh hy k kisi ny kisi ko izaa pohanchaai tou wo ous ko intni he izza pohanchaye or ehsan yeh hy k ous ke ziadti ko moaaf kr dy or ous k saath naiki kry.
kisi ke naiki k badly mein itni he naiki karna adal hy or ous sy zaaid krna ehsan hy.
Adal farz hy or ehsan nafal hy.
Sufiyan Bin Ainiaa kehty hein k,
Adal yeh hy k tumhara zahir or batin barabar ho or ehsan yeh hy k tumhara zahir batin sy afzal ho.
Piary Mola Ali a.s ka farman hy k,
“Adal insaaf sy hy or ehsan insaaf sy zaaid cheeze hy”
yeh kisy nai maloom k mohabat ka jwab mohabat ke trah, or ehsan ka sila ehsan k siwa keya ho sakta hy.
Msg 2
Sorat Rehman
Aayt 60
mein Allah frmata hy,
“Ehsan ka badla ehsan k siwa kia hy”
Is sy wazeh hota hy k jis ny banda hoty hoay apni zindagi k haqooq ko husn o khoubi sy injaam deya tou kia Allah apni shan e banda nwazi mein koe kami rehny dy ga or kia wo kisi ke naiki or ehsan ko zaya kr dy ga, nai balky Wo ous ka ajar dainy mein bukhal sy kaam nai ly ga.
Allah ka irshaad hy k
Wo ehsan krny walon sy mohabat rakhta hy.
Msg 3
Mohsineen bari mubarik hastiyan hein jin k bary ..mein Allah
Sorat Al-Aaraaf mein farmata hy,
Tarjuma:-
“Beshak Allah ke rehmat ehsan krny waly k qareeb hy”
Mohsin ehsan krny sy banta hy or ehsan yeh hy k jis ko Allah ke raah mein kuch deya jata hy ous ka shukr bhe ada keya jata hy k qabool karny waly ke badolat faani shay daaimi naimat ban gi hy or paish karny wala qabool karny waly ke badolat Allah k piaron ke saff mein shumaar ho geya hy.
Ehsan ke dou qismein hein.
i. Allah k sath ehsan yani khaliq ke taazeem krna.
ii. Makhlooq k saath ehsan yani makhlooq par shafqat krna.
Hazrat Shadaad Bin Qais r.a biyan krty hein k Aap S.A.WW ny farmaya,
“Allah ny har cheeze k saath ehsan (husn e salook o naki) ka hukm deya hy jab zibah kro tou achi tarah kro or tum mein sy kisi ko chahiye k wo churi taiz kry or zabeeha ko rahat pohanchaye”.
Msg 4
Agar haqeeqat ke nazar sy daikha jaye tou naiki karna ehsan or ehsan karna naiki hy.
yeh aik he sikky k dou rukh hein.
Yeh baat bhe haqeeqat hy k insani umer mein hony wali tadeelion ka khaliq Allah hy or darasal yeh umer he insan ka baish baha qeemti sarmaya hy jisy Allah or Oss k Habib S.A WW k razi krny mein guzarna chahiye or behsiyat musalman zindagi k har goshy ko naik amaal sy sajana or aabaad rakhna hy.
Logon k saath naiki or oun k saath ehsan krna chahiye is sy Allah or ous k Mehboob S.A.WW sy mohabat ka rang milta hy.
Naiki or ehsan dono laazim o malzoom hein.
Piary Aaqa S.A.WW ka irshaad e aaliya hy,
“Naiki achy ikhlaaq ka naam hy, or gunnah wo hy jo tery dil mein khatky or tujhy na pasand ho k logon ko is ka pata chaly”
yeh tou sub ko maloom hy k Piary Aaqa S..A.WW makarm e ikhlaaq k leay tashreef laaye thy.
Tarrekh shahid hy k Allah or Oss Rasool S.A.WW par emaan laany walon mein islaam sirf ikhlaaq k zariye he dakhil hoa tha or hota hy, kisi cheeze par jabar nai keya ja sakta kion k yeh islaam ka mizaj he nai k ousy bazor e shamsheer phailaya jaye.
Msg 5
Ehsan karny walon sy Allah mohabat rakhta hy.
Allah ta’ala naikon ke oulaad ke bhe hifazar krta hy khaw wo ous sy nisbat mein bohat dour hon
or yeh bhe riwayat hy k,
Allah ehsan krny walon ke oulaad ke saat pushton tak hifazat farmata hy.
Naik shakhs k muqabil mein badkaar o fasiq o fajir hy jo na sirf ta hayat balky baad az marg bhe apni shohrat k sath mojoud rehta hy or hamesha yaad rakha jata hy.
Lakin aik baat bari wazeh hy k ehsan agar badkaar shakhs bhe kry tou ous ka bhe ajar hy khaw wo kisi naik shakhs par kry.
Msg 6
Kehty hein k do shakhs jangle mein safar kr rahy thy oun mein sy aik naik or dousra badkaar tha, chalty chalty naik aadmi shidat e piyas sy behosh ho kar gir para,
paani badkaar k pass tha ous ny socha,
“Agar pani isy dy deya tou ja mujhy pias lagy gi tou phir keya ho ga”
lakin ous ny khud par ous behosh shakhs ko tarjeeh di ous par pani chirka jab wo hosh mein aaya tou baqiya paani bhe pila deya.
Qayamat k din frishty ous badkaar shakhs ko dozakh ke taraf ly ja rahy hon gy k ous ke nazar ous naik aadmi par pary gi jis par ous ny ehsan keya or pani pilaya tha, yaad krwany par wo pehchan ly ga, wo frishton sy rukny ko kahy ga or Allah sy arz kry ga,
Aey Allah Too janta hy is ny mujh par ehsan keya isy mujhy hibba kr dy.
Allah farmaye ga,
“Yeh tery leay hy”
lehaza wo naik aadmi ous ko pakar kar janat mein ly jaye ga.
Msg 7
Naik kaam or dousron par ehsan krny k leay insan k pass bari mukhtasir zindagi hy jis ka koe aitbaar nai k kab or kis maqaam par saans ke dori toot jaye, is leay hamesha is baat ka khiyal rakhna chahiye k Allah ny ehsan ko pasand farmaya hy or ehsan karny walon sy mohabat rakhta hy.
is baat ka ehsas he dousron par ehsan karny k jazby ko zinda rakhy ga.
Ehsan ko zair e nazar waqiya mein bohat khoubsorti sy biyan keya geya hy, kaha jata hy k aik baadshah k fout hony k baad jab dousra shakhs baadshah bana tou ous ny apny khazany mein zar o jwahir k ilawa gandum k chand daany bhe daikhy jo aam gandum k daano sy jisamat mein bohat bary thy, badshah ny apny wuzra o umraa sy daryaft keya lakin…
Msg 8
wo is raaz sy aagah na thy.
Baadshah ny tehqeeq ke tou aik bazurg ny btaya k gandum k khait mein aik nojwan or bourhy ke shirakat thee.
Fasal tayar hony k baad ounhon ny aapas mein aadhi aadhi taqseem kr li, oun mein yeh bhe tay paya k in mein sy jab aik gandum ko ghar ly kar jaye ga tou dousra gandum ke hifazat kry ga.
sub sy pehly jab bourha apni gandum ko gadhy par laad kar ghar ly geya tou nojwan sochny laga,
“Main noujwan hon, mehnat mazdoori kar sakta hon jab k mera saathi bourha, kamzor or laaghar hy meri nisbat is ko anaaj ke ziada zaroorat hy”
chunachy ous ny apni gandum mein sy kuch nikal kar bourhy ke gandum k dhair mein shamil kar di.
Bourhy k wapis aany par jab noujwan apni gandum ko gadhy par laad kr ly jany laga tou bourha sochny laga,
“Mera saathi jwan hy is ke zarooriat mujh sy ziada hein jab k mujhy gandim ke itni hajat nai hy”
yeh soch kr ous ny apni gandum mein sy kuch gandum nikal kar noujwan ke gandum mein shamil kar di.
Har baar aisa he hota raha k aik k jany k baad dousra apni gandum mein sy kuch bacha kar dousry ke gandum mein shamil krta raha.
chunachy aik dousry ke khair khawahi k nateejy mein Allah ke rehmat sy gandum k dany moty hony lagy is leay baadshah ny gandum k daano ko apny khazany mein rakh leya jo aik dousry k saath khair khawahi ke zinda misaal hein.
Kia hamary andr bhe kisi k saath ehsan ya khair khawahi ka aisa he ehsas baidaar hoa hy jo hamesha k leay dousron k leay misaal ban jaye….??
EXERCISE QUESTIONS
MCQ’s /5
1. Jitna kisi ka haq banta hy ous sy kam ly tou,
a. Ehsan hy
b. Adal hy
c. Ghalat hy
2. Mohsin banta hy,
a. sach bolny sy
b. shukar karny sy
c. Ehsan karny sy
3. Allah farrmata hy,
“Ehsan ka badla ehsan k siwa kuch nai”
a. Sorat Rehman mein
b. Sorat Fateha mein
c. Sorat Ikhlas mein
4. Ehsan yeh hy k zahir batin sy…
a. Kam ho
b. Afzal ho
c. Brabar ho
5. Ehsan ka darja adal sy…
a. Kam hy
b. brabar hy
c. ziada hy
Fill in the Blanks /5
1. Adal ___ hy or ehsan ___ hy.
2. Adal insaaf sy hy or ___ insaaf sy ziada hy.
3. Allah ehsan krny walon ki oulaad ke ___ pushton tak hifazat farmata hy.
4. Piary Aaqa S.A.WW ___ k leay tashreef laaye.
5. Naiki or ehsan dono ___ hein.
True / False /5
1. Allah ehsan krny walon sy muhabat rakhta hy.
2. Ehsan ka badla ehsan k siwa kuch nai.
3. Badkaar shakhs ko ehsan ka badla nai deya jaye ga.
4. Allah ny har cheeze k sath ehsan farz nai keya.
5. Naiki k badly naiki sy ziada krna ehsan hy.
Short Answer Questions /15
1. Ehsan kia hy?
2. Adal or ehsan mein keya farq hy??
3. Mohsineen k bary mein Allah ny quran mein kia farmaya? (koe aik aayat)
4. Ehsan ke dou qismein konsi hein??
5. Share karain k…
kia hum dousron k sath ehsan krty hein ya badla laity hein.
ANSWER SHEET
MCQ’s
1. (a)
2. (c)
3. (a)
4. (b)
5. (c)
Fill in the Blanks
1. Farz / Nafal
2. Ehsan
3. Saat (7)
4. Makaram e ikhlaaq
5. Lazim o Malzoom
True/False
1. ✔
2. ✔
3. ✖
4. ✖
5. ✔
Short Answer Questions
1. Kisi bhe achy amal k badly mein ous sy ziada krna or kisi bhe bury amal k badly mein ous sy kam krna ehsan hy.
(Hkrs apny ilfaz mein btaein gy laikn is ka jwab is k mutabiq check krna ho ga)
2. Kisi bhe achy ya bury amal k badly mein ous k brabar karna adal hy jab k ehsan achy amal k badly ous sy ziada krna or bury amal k badly mein ous sy kam krna hy.
3. Yeh har aik ka apna jawab ho ga.
4. Answer:
?1. Allah k sath ehsan yani ikhlaaq ke tazeem karna.
?2. Makhlooq k sath ehsan yani makhlooq par shafqat karna.
5. Yeh har aik ka apna jawab ho ga.